Lamentations 5

1 ^aKumbuka, Ee Bwana, yaliyotupata,
tazama, nawe uione aibu yetu.

2 ^bUrithi wetu umegeuziwa kwa wageni,
na nyumba zetu kwa wageni.

3 ^cTumekuwa yatima wasio na baba,
mama zetu wamekuwa kama wajane.

4 ^dNi lazima tununue maji tunayokunywa,
kuni zetu zapatikana tu kwa kununua.

5 ^eWanaotufuatilia wapo kwenye visigino vyetu,
tumechoka na hakuna pumziko.

6 ^fTumejitolea kwa Misri na Ashuru
tupate chakula cha kutosha.

7 ^gBaba zetu walitenda dhambi na hawapo tena,
na sisi tunachukua adhabu yao.

8 ^hWatumwa wanatutawala
na hakuna wa kutuokoa mikononi yao.

9 Tunapata chakula chetu kwa kuhatarisha maisha yetu
kwa sababu ya upanga jangwani.

10 ⁱNgozi yetu ina joto kama tanuru,
kwa sababu ya fadhaa itokanayo na njaa.

11 ^jWanawake wametendwa jeuri katika Sayuni,
na mabikira katika miji ya Yuda.

12 Wakuu wametungikwa juu kwa mikono yao,
wazee hawapewi heshima.

13 ^kVijana wanataabika kwenye mawe ya kusagia,
wavulana wanayumbayumba chini ya mizigo ya kuni.

14 ^lWazee wameondoka langoni la mji,
vijana wameacha kuimba nyimbo zao.

15 ^mFuraha imeondoka mioyoni mwetu,
kucheza kwetu kumegeuka maombolezo.

16 ⁿTaji imeanguka kutoka kichwani petu.
Ole wetu, kwa maana tumetenda dhambi!

17 ^oKwa sababu hiyo, mioyo yetu inazimia,
kwa sababu ya hayo, macho yetu yamefifia,

18 ^pkwa ajili ya Mlima Sayuni, ambao unakaa ukiwa,
nao mbweha wanatembea juu yake.

19 ^qWewe, Ee Bwana unatawala milele,
kiti chako cha enzi chadumu kizazi hadi kizazi.

20 ^rKwa nini watusahau siku zote?
Kwa nini umetuacha kwa muda mrefu?

21 ^sTurudishe kwako mwenyewe, Ee Bwana,
ili tupate kurudi.
Zifanye mpya siku zetu kama siku za kale,

22 ^tisipokuwa uwe umetukataa kabisa
na umetukasirikia pasipo kipimo.